شئ وإنكسر// شعر محمد توفيق

شئ وإنكسر
==========.
شيئ وإنكسر
ومين يصدق مهما أقول
إنى برئ من اللى حصل
شيئ وإنكسر
جرحى ما يقدر يحمله كل البشر
حتى الدموع
إتحجرت جوه فى عيونى
والأه بطعم المر طالعةمن ضلوعى
واللى بيحصل
ده كتير والله علىَّ
جايز فى مرة تاهت منىَّ خطوتى
جايز مشيت فى سكة تانية
والسكة دى مش سكتى
جايز
وجايز
بس الأكيد إن بدموعى
نفسى أمحى اللى حصل
وجوايا شيئ
بس إنكسر
--------------.
معقولة كل الحب ضاع
معقول ده وهم وكان خداع
ولا دى وقفة من الزمان
علشان يبين
مين أشترى
ومين اللى باع
إن كان عقاب
أنا رضيت باللى حكم بيه الزمان
وإن كان عتاب
متجدديش تانى جراحى بالملام
يكفينى والله دمعتى
وإنى صبحت
بشُك حتى فى خطوتى
لفين هروح
وأنتى الدليل لسكتى
من غير شعاعك
مين راح يأنس وحدتى
يكفينى بس عذاب ضميرى
جوايا شيئ من أعلى قمة بينادينى
إن هواكى
أقوى كتير من اللى حصل
وجوايا شيئ
بس أنكسر
--------------.
لملمى بأيدك جروحى
وجمعى روحك وروحى
وبلاش معاندة
بلاش فراق
بلاش عتاب
وبلاش عذاب
دى الرحلة مهما طولت
لا بد ليها من رفيق
حتى الغيوم مهما إتجمعت
وبددت نور الطريق
لا بد شمس الحب تطلع من جديد
وتمحى كل اللى حصل
وجوايا شيئ
بس إنكسر
-----------------.
شعر/ محمد توفيق